Luke 2

Maliya'a Yesu'mo alino ate'niya gemae

(Mt 1:18-25)

1Ani afina'mo hogote vekamo yagaino ne'apateya kini vekamo agi'amo Sisa Agasasi'a, muki kotega mai'naya vaya'ai apakimo aliguve, huno hapa pai'niye. 2Ani afina'mo apakimo hogote'a ali'naya afina'mo Kiniyasi'a Siliya kotega mai'naya vaya'aite'mo yagaino apate'niye. 3Muki vaya'amo apakinago vaya'ai taonifi'mo u'a apakimo alisiyafe'mo u'nae. 4Yosefe'a Nevini vayapati vekamo mai'niya'mofe'mo Nasalasa taonimo Galeliya kotegati'mo ataleno Yutiya kotegamo aginago vekamo Nevini taonifi'mo Metelehamumo u'niye. 5Lekana pai male'niya a'mafa'nemo Maliya'a aipagu'e'mo mai'nige'anae'mo anakimo alisiyafe'mo u'na'ae. 6Ani kote'mo mai'ne'anae'mo Maliya'a mafa'nemo alino atesiya afina'mo ago afole ai'niye. 7Yege mafa'ne'amo alino ateteno lavolavofi'mo hayaeno ateteno pulumakamogi ne'ya'mo ne'malaya yuvapafi'mo havaeno ate'niye. Alu kotegati'mo nata ne'a ne'aya vaya'mo nehavaya nopi'mo ago kili pae'nage'ana pulumakamogi nopi'mo havaesa'afe'mo mai'ne'anae'mo alino ate'niye.

Enisole vekamo'a sipisipile'mo ne'yagaiya vaya'aife'mo hapa pai'niya gemae

8Hani'ilagamo ani taoni haopalegamo sipisipile'mo ne'yagaiya vaya'mo kahaule'mo mai'ne'a sipisipile'mo yagai'a mai'nae. 9Ala kava ne'mo enisole veka'amo afole ai'nigeno Ala kava ne'mo ha le konali ya'amo'mo aeno ha le'nige'apae'mo lusi kava hu'a apamo'ya ai'nae. 10Enisole vekamo'a hapa paino'ae'mo, lapamo'ya o'aitapa afiyo. Alagepa gemo muki vaya'mogi afite'a lusi kava hu'a apamogaga aisaya gemo alini'na emi'ne'nove. 11Ani afina'mo Nevini taonifi'mo mago a kanomo'a apakufamo alino katino apatesiya mafa'nemo alino ate'niye. Ani mafa'nemo Kalaisi ne'mo Ala kava ne'mo mai'niye. 12Lapakaemo agesaya agufa alagena kava'mo hane'niyana lavolavofi'mo hayaeno ateteno pulumakamogi ne'ya'mo ne'malaya yuvapafi'mo havaeno ate'nigeno mai'niye. Utapa agetetapae'mo ani mafa'nee'mo laha pai'niye, hutapa hugae, huno hapa pai'niye. 13Hapa pai'nige'apae'mo malage hu'a agae'e'mo asole enisole vaya'mo afole aite'a Goti agi'ale'mo ali'a asaga hu'a ate'apae'mo, 14Goti'a aeno apakase'niya vekamo hogote vekamo agi'ale'mo alita asaga higetao. Goti'a amuse huno ne'apateya vaya'ai apaipamo'mo falu hino, hu'a hute'a apatale'a koku'napi'mo hai'nae.

Sipisipile'mo ne'yagaiya vaya'mogi u'a Yesu'mo age'naya gemae

15Inagi sipisipile'mo ne'yagaiya vaya'mogi apakai'apimo hu'apae'mo, Metelehamu taonifi'mo afole ai'niya kavafe'mo Ala kava ne'mo'a laha pai'niya kava'mo uta agesunafe'mo vigetao, hu'a hute'a 16malage hu'a u'a apakayana Maliya'agi Yosefe'agi pulumakamogi ne'ya'mo ne'malaya yuvapafi'mo havaeno mai'niya mafa'negi hu'a mai'nage'apae'mo apake'nae. 17Agete'apae'mo ava gemo afi'naya gemo hapa pai'nage'apae'mo 18muki vaya'amogi afite'apae'mo lusi kava hu'a apakesa ala'amo afi'nae. 19Maliya'a ani muki hu'naya ge'amo afino alino aipafi'mo maleteno agesa afino mai'niye. 20Sipisipile'mo ne'yagaiya vaya'mo ai'a atagi ne'a ne'u'apae'mo enisole vekamo'a hapa pai'nige'a afi'naya ge'e age'naya kavate'efe'mo Goti agi'ale'mo ali'a asaga huge hao ke hege hume hume u'nae.

Yesu agi'amo ate'naya gemae

21Magoke salemo utege'a Yu vaya'mogi nehaya agufa kava'mo hu'a Yesu agufamo lagau'a atalete'apae'mo agi'amo Yesu'ae hu'a ate'nae. Maliya'mo aipagu'e'mo o'mai'nigeno'ae'mo enisole vekamo'a ani agimo ate'niye.

Yesu'mo alopa mono notegamo avaleli'ana u'na'a gemae

22Mosese'a, a'nemogi mafa'nemo ali'a apatete'apae'mo ae'a kalo pae'a apatesayafe'mo ofalinimo alinitutapa mono hu'a ne'apataya vaya'mo apamiyo, huno hu'niya gemo akame hisaya afina'mo afole ai'nige'ana Yosefe'e Maliya'e'mo avaleli'ana Yulusalemu taonifilagamo u'na'ae. Goti aulagale'mo avaleli'u'ana atesa'afe'mo avaleli'ana u'na'ae. 23Ani kavatefe'mo Goti ke'aepa gemo'mo huno'ae'mo,Yege mafa'netapimo alita apaote apate'netapa Goti'a amiyo, huno hu'niye. 24Ala kava ne'mo ke'aepa ge'amo'mo mago'e gemo huno'ae'mo,Lole kaugo'yave namala'mo neya namala'mo anatafautapa namiyo, huno hu'niya gemo akame hisa'afe'mo u'na'ae.

25Mago vekamo Yulusalemu taonifi'mo mai'niya vekamo agi'amo Simiyoni'a fatago kava'mo huno Goti ke'aepa ge'amo akame huteno Isaleli vaya'mo hapau vaisiya afinafe'mo agava mai'niye. Aote Auneme'amo'mo agaetegamo emineno, 26ofalika afa'a mai'nekae'mo Ala kava ne'mo Kalaisi vekamo agegane, huno ha pai'niye. 27Auneme'amo'mo alopa mono nopi'mo avalelino haino ate'nige'anae'mo Yesu ita'afo'ala'moganimo ke'aepa gemo akame hisa'afe'mo mafa'ne'animo Yesu'mo alopa mono nopi'mo avaleli hai'ana mai'na'ageno 28Simiyoni'a eno Yesu'a avaleno anu ki'neno Gotife'mo hao ke heteno'ae'mo,

29Ala kava nene, Naha pai'nana gemo hemenimo ago alika afole aika ate'nana'mofe'mo ali'yakamo ne'aluva vekamo'nae'mo kaipamo'mo falu hu'nisigeka ali'yakamo ataleka eno, huka naha paigane. 30Muki nofi vaya'ai apaulagale'mo apakufamo alino katino apatesiya vekamo ago alika afole aika ate'nanage'nae'mo naulagafati'mo age'nova'mofe'mo hemenimo afa'a faliguve. 32Agaemo ha le yakana huno mai'neno mago alu nofi vaya'aitegamo aeno ha lesige'apae'mo age'a aeto hugae. Ani kava huno Isaleli vayakamo ala apaki'apimo apamigiye,
huno hu'niye. 33Ita'afo'ala'moganimo ani gemo afite'anae'mo lusi kava hu'ana hanau ai'na'ae. 34Simiyoni'a, Goti'mo lapa maeno, huno huteno ita'amo'mo Maliyafe'mo, Afiyo, mago vaya'amogimo ge'amo o'afi'a atale'a asagau'a aige mago vaya'amogimo ge'amo afite'apae'mo he ti'a maige hisayafe'mo Goti'a lekana paino ate'niye. Agaemo Gotitegati'mo alagena yakana huno alino apave lisige'apae'mo apaini hu'a atesageno'ae'mo 35asole vaya'ai apaipa apakesafi'mo hane'niya kava'mo alino afole aino ategaiye. Naipemo'mo kaipafi'mo aesigeno kagafu kigiye, huno ha pai'niye.

36Mago anekalomo'a Gotitegati gemo alinineno aeno hakalo huno hapa nepaiya anekalomo agi'amo Ana'mo mai'niye. Ana afo'amo agi'amo Fanuvela'mo Asa nofi vayapati vekamo mai'niye. Ani a kanomo vele'mo seveni'a kafugamo mai'nigeno anau'amo'mo ago fali'niya afinateti'mo kogu a kanomo maime maime eno 84'a kafugamo mai'niye. 37Muki afina'mo alopa mono nopi'mo mai'neno'ae'mo muki netepi'e hanipi'e'mo Gotife'mo mono huge nunumu'mo huge ne'ya'mo mo sige huno mai'niye. 38Ani afina'mo Yesu'e ita'afo'ala'mogani'e'mo apakaetegamo eno Gotife'mo hao ke heteno'ae'mo mafa'ne'ae'mo ava gemo huno'ae'mo Yulusalemu vaya'ai apakufamo alino katino apateteno hatu maeno apatesiyafe'mo agava mai'naya vaya'aife'mo hapa pai'niye. 39Muki ke'aepa ge'amo alagi akame hu'ana hute'anae'mo ko'anilegamo Galeliya kotega Nasalasa taonifi'mo u'nae. 40Ani mafa'nemo ko sino alopa heteno'ae'mo lokiya vaino mai'niye. Goti'a alagepa huno ha mae'nigeno alagepa huno afiteno age'nigeno alagepa aipa agesa afole ai'niye.

Yesu'a neya mafa'nemo'mo alopa mono nopi'mo haino mai'niya gemae

41Yesu ita'afo'ala'moganimo hopa Pasova afina'mo muki kafuga'ae kafuga'ae'mo Yulusalemu taonifi'mo hai'na'ae. 42Yesu'a tuolofu'a kafugamo mai'nige'a hopa afina'mo nehaya agufa kava'mo hu'a halate Yulusalemu taonifi'mo hai'nae. 43Hopa afina'mo hano hutegeno Yesu'a ataleno o'uno ani taonifi'mo mai'niya'monanafa Yosefe'e Yesu ita'amo'e'mo, ani taonifi'mo mai'negaiye, hu'ana anakesa o'afi'ana ago atale'ana u'na'ae. 44La'ao vaya'e'mo magokepi lokaeli'a u'negae, hu'ana anakesa afite'ana muki nete'e une'e'mo kategamo ute'anae'mo aepa fai'ana anao vaya'aife'mo ge hu'ana apafi ge apafi ge hu'ana kahauya hume hume u'na'ae. 45O'age'ana halate ai'ana atagi ne'ana Yulusalemu taonifi'mo u'ana kahauya hu'na'ae. 46Lole'e mago'e afina'mo kahauya hu'na'ana alagi o'age'ana kahauya hu'ana aga'ana Yesu'a alopa mono nopi'mo ali'a apaya ne'malaya vaya'e'mo fai mai'neno hu'naya gemo afige loka huno apafi ge huno mai'nige'ana age'na'ae. 47Hu'niya gemo afi'naya vaya'mogi, alagepa huno afiteno ge'apile'mo alagepa huno aeno atagaina huno hapa nepaiye, hu'a hute'a hapau ai'nae. 48Ita'afo'ala'moganimo agete'anae'mo hanau aite'ana ita'amo'mo, mafa'ne'nimogae, huno, na kava higeka la'agaetegamo ani kava'mo hu'nane. Afokamo'e nagae'e'mo la'aipamo'mo kana hu'nigeta'a kagaefe'mo kahauya nehu'ae, huno ha pai'nigeno'ae'mo, 49Na kava higetanae'mo nagaefe'mo kahauya neha'ae. Afo'nimo ali'ya'amo alisuva kavafe'mo lanakesa o'afi'na'afiye, huno hana pai'niya'monanafa 50ani gemo aepa'amo alagepa hu'ana o'afi'na'ae. 51Inagi anakae'e'mo magokepi lokaeli'a lami'a Nasalasa taonifi'mo mai'ne'apae'mo Yesu'a muki afina'mo ita'afo'ala'mogani ge'animo akame huno mai'niye. Ita'amo'mo muki ani kava'mo hu'niya kavafe'mo agesa afiteno aipafi'mo alino male'niye. 52Yesu'a ko siteno'ae'mo mago'e huno alagepa huno afi'niye. Goti'e vaya'amogi'e'mo mago'e hu'a amuse hu'a ate'nae.